وتمر الأيام سريعاً لا ندرى كيف تمر ولا كيف تجري بينا الا حين نجدها قد فاتت وهي تحمل فى طياتها الكثير كانت اخر تدوينة هنا بمناسبة عيد الفطر للعام الماضى لا ادرى كيف مضينا اشهر دون ان تضع احدنا كلمة هنا
ايه اللى انا بكتبه ده ايام ايه وليالي ايه معلش يا يوما يا اختى الجلالة خدتنى ونسيت اننا عاملين المدونة دى للتهيس يعنى مش للكلام المعقد ده اصل انا داخلة اقول كل سنة واحنا بنعيد مع بعض هنا لاقيت طبق الكحك لسه هنا بحطة ايدى من السنة اللى فاتت وريحته بعد ماعفن ماليه المدونة ففتحت الشبابيك ونفضت التراب قبل ما تيجى تفضحينا وتقوليلى احنا نقفلها احسن بدل الركنة دى
بقى بزمتك تهون عليكى المدونة نقفلها اى نعم هى مهجورة بقالها سنة ياخبر سنة عدت كده من اخر بوست انا نزلته فيها زى اليومين دول الايام فعلا بتعدى بسرعة ولا احنا اللى اتعودنا على ان الايام بتيجي عشان تخلص فبقينا مش بنحس بيها وهى بتجري
عدت سنة من عمرنا هو انا قولتلك قبل كده يا مضروبة انى بجد نفسي اشوفك قبل ما اموت عااااااااااااااااااااااااااااااااااااااااا لاء ماهو مش معقول هنقضيها نت كده شوفى احنا لو فقدنا الامل نعمل زى ما قولتلك قبل كده نتقابل ع الحدود ونشاور لبعض من وراء الاسلاك الشائكة - ايه موضوع الاسلاك الشائكة دى تفتكرى فعلا ع الحدود اسلاك بتكهرب وكده - لو كده خليكى فى بيتكم احسن انا صرفت نظر خلاص مالو النت العمر مش بعزءة ولو ماسعتناش الدنيا نتقابل فى الاخره على خير اهئ اهئ اهئ بس تفتكرى هنعرف بعض من غير اميلات وفيس بوك ومدونة مممممم ابقى حطة وردة في شعرك او انا هلبس جزمة حمرا عشان مانتهوش من بعض بس ونقدر نعرف بعض قال يعنى مش هاريين بعض صور فى كل المناسبات وحافظين شكل بعض
المهم يعنى كل سنة وانتى طيبة بما ان عيدكم قبلنا بيوم وهتفطروا بكره ربنا يجعله عيد سعيد عليك يارب
ملحوظة
بعد ما تخلصى طبق الكحك شيليه من هنا عشان الصراصير والدبان وكل الكائنات الحشرية اصل عندى فوبيا
ابقى حطيه فى التلاجة ده لوفاض منه حاجة يعنى ومخلصتيش عليه كله
